ថ្លែងប្រាប់អ្នកសារព័ត៌មាននៅខាងក្រៅកិច្ចប្រជុំលើកទី២របស់គណៈកម្មការអន្តរក្រសួងសម្រាប់ដឹកនាំត្រួតពិនិត្យនិងវាយតម្លៃលើគោលនយោបាយជាតិស្តីពីមុខរបរនិងការងារនៅសណ្ឋាគារអាំងទ័រកុងទីណុងតាល់ កាលពីព្រឹកថ្ងៃទី២៦ ខែកក្កដា លោក អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈបានមានប្រសាសន៍ថា បច្ចុប្បន្ននេះអត្រាការងារធ្វើនៅប្រទេសកម្ពុជាមានរហូតដល់ទៅ៩៩,៣ភាគរយ ដែលជាអត្រាមួយខ្ពស់ដោយសារកំណើនសេដ្ឋកិច្ចកើនដល់៧ភាគរយដែលបានផ្តល់ឱកាសដល់ការវិនិយោគ បង្កើតរោងចក្រ សេវាកម្មថ្មីៗ សេដ្ឋកិច្ចក្រៅប្រព័ន្ធ ការដឹកជញ្ជូនផ្សេងដល់កម្លាំងពលកម្មថ្មីចំនួន៣០ម៉ឺននាក់ បានចូលក្នុងទីផ្សារការងារក្នុងមួយឆ្នាំៗ។
លោករដ្ឋមន្ត្រីបានបន្តថា ចំណែកប្រជាពលរដ្ឋដែលគ្មានការងារធ្វើ០,៧ភាគរយដោយសារតែពួកគេខ្វះចំណេះជំនាញ មិនទាន់ទទួលបានព័ត៌មានគ្រប់គ្រាន់ពីទីផ្សារការងារនិងមានពលរដ្ឋខ្លះមិនចង់ធ្វើការតែម្តងដោយពឹងផ្អែកទៅលើក្រុមគ្រួសារ។
លោករដ្ឋមន្ត្រីបានបន្ថែមថា ទីផ្សារការងារច្រើនជាងគេរួមមានផ្នែកឧស្សាហកម្មកាត់ដេរ ស្បែកជើង ផ្នែកផលិតសម្ភារៈធ្វើដំណើរ គ្រឿងបន្សំផ្នែកអេឡេចត្រូនិច ការផ្គុំអេឡេចត្រូនិចដូចជាទូរស័ព្ទ ម៉ូទ័រ និងគ្រឿងអេឡេចត្រូនិចផ្នែករថយន្ត ផ្នែកឧស្សាហកម្មមានជំនាញខ្ពស់ ផ្នែកសំណង់ កសិកម្ម និងកសិឧស្សាហកម្ម។
លោករដ្ឋមន្ត្រីបានបញ្ជាក់ថា បច្ចុប្បន្ននេះរដ្ឋាភិបាលបានដាក់ចេញនូវគោលនយោបាយជាច្រើនដើម្បីជួយដោះស្រាយការងារ មុខរបរ និងការគ្រប់គ្រងការងារ អភិវឌ្ឍន៍វិស័យឧស្សាហកម្ម និងវិជ្ជាជីវៈថ្មីៗនិងប្រមូលព័ត៌មានទីផ្សារតាមស្ថាប័នទាំងអស់យកមកចងក្រងជាទីផ្សាររួមនឹងច្បាស់លាស់ជួនប្រជាពលរដ្ឋពិសេសយុវជនយុវនារីដែលត្រូវការឱកាសការងារថ្មីៗរបស់ខ្លួន។
លោក ទុន សុភ័ណ្ឌ អ្នកសម្របសម្រួលជាតិនៃអង្គការអន្តរជាតិខាងការងារនៅកម្ពុជាបានអបអរសាទរស្ថានភាពមានការធ្វើច្រើនរបស់ប្រជាពលរដ្ឋកម្ពុជា។ តែយ៉ាងក៏ដោយលោកស្នើដល់ រាជរដ្ឋាភិបាលបង្កើនការបណ្តុះបណ្តាលបច្ចេកទេសជំនាញវិជ្ជាជីវៈដល់ប្រជាពលរដ្ឋឲ្យបានច្រើនបន្ថែមទៀតដើម្បីអភិវឌ្ឍន៍ធនធានមនុស្សឆ្លើយតបនឹងទីផ្សារការងារបច្ចុប្បន្នចូលរួមកាត់បន្ថយអត្រាអត់ការងារធ្វើនៅកម្ពុជាឲ្យកាន់តែទាបបន្ថែមទៀត។
គួរបញ្ជាក់ថា ស្ថានភាពគ្មានការងារធ្វើនៅកម្ពុជាមានកម្រិតទាបនេះដោយសារតែទីផ្សារការងារនៅក្រៅប្រទេសបានស្រូបយកពលករខ្មែរយ៉ាងច្រើនដែលបច្ចុប្បន្ននេះមានពលករខ្មែរកំពុងធ្វើការនៅក្រៅប្រទេសប្រមាណ១លាន២សែននាក់ ដោយផ្តល់ចំណូលចូលប្រទេសជាតិប្រមាណជាង១ពាន់លានដុល្លារអាមេរិកក្នុង១ឆ្នាំៗ៕
